ནུབ་གཞས་ཟེར་བའི་གཞས་ཁྱད་པར་ཅན་དེ་ཡང་ ཧེ་མ་ཞབས་དྲུང་རིན་པོ་ཆེ་གིས་ རྒྱལ་ཁབ་ཀྱི་ཕྱོགས་སོ་སོ་ལུ་ ཕྱོགས་ཀྱི་སྤྱི་བླ་དང་གཞུང་གི་རྫོང་དཔོན་ཟེར་མི་ཚུ་ ཞབས་དྲུང་རིན་པོ་ཆེ་ཁོ་རའི་སྐུ་ཚབ་སྦེ་བསྐོས་གནང་བའི་སྐབས་ ཆོས་རྒྱལ་མི་འགྱུར་བརྟན་པ་མཆོག་ ཀྲོང་གསར་དཔོན་སློབ་དང་པ་སྦེ་བསྐོས་གནང་ནུག། དེ་བཟུམ་གྱི་གཞས་ཁྱད་པར་ཅན་འདི་ ཀྲོང་གསར་རྫོང་ལས་ནུབ་ཁ་ཐུག་ལུ་ཡོད་པའི་ནུབ་པའི་རྒེད་འོག་ལས་ སྦྱིས་གཡུས་ཚན་གྱི་མི་རྒས་ཤོས་དང་ མཁསཔ་བློ་རིག་ཅན་ཚུ་གིས་ཧེ་མའི་གཞས་རིགས་ཚུ་ལུ་གཞི་བཞག་སྟེ་བརྩམས་ཡོདཔ་སྦེ་བཤདཔ་ཨིན་པས།
གཞས་དཔོན་དང་པ་ ཨཔ་ཚེ་རིང་འབྲུག་རྒྱལ་གྱིས་འབད་ ཁོང་རའི་གཡུས་ཚན་ནང་ལུ་ ལྷ་གསོལ་བོན་གསོལ་དང་ དགའ་སྟོན་རྟེན་འབྲེལ་བརྩི་སྲུང་གི་སྐབས་ལུ་ རྐྱབ་ནིའི་སྲོལ་བཙུགསཔ་མ་ཚད། ཤུལ་ལས་ཀྲོང་གསར་རྫོང་ནང་ ལོ་བསྟར་ཚེས་བཅུ་དང་ གཞན་མཛད་སྒོའི་རྟེན་འབྲེལ་ཁྱད་པར་ཅན་བརྩི་སྲུང་ཞུ་བའི་སྐབས་ལུ་གཞས་འདི་རྩ་ཅན་ཅིག་འབད་ ཆེ་མཐོའི་གོངམ་ཚུ་དང་ མི་མང་ལུ་སྤྱན་ཞུ་ཕུལ་ནིའི་སྲོལ་བཙུགས་གནང་ནུག།
དེ་ལས་ཀྲོང་གསར་དཔོན་སློབ་རིམ་བྱོན་ཚུ་གིས་ མི་ཉམས་གོང་འཕེལ་བཏང་གནང་བའི་ཁར་ ལྷག་པར་དུ་ཀྲོང་གསར་དཔོན་སློབ་མི་རྗེ་འཇིགས་མེད་རྣམ་རྒྱལ་དང་ འབྲུག་བརྒྱུད་འཛིན་གྱི་རྒྱལ་རབས་རིམ་བྱོན་ཚུ་གི་སྐབས་ལུ་ དར་ཁྱབ་དང་གོང་འཕེལ་གནང་སྟེ་ གཞས་ཁྱད་པར་ཅན་ཅིག་ལུ་ གྱུར་ཡོདཔ་ཨིན་པས།
གཞས་ཆས།
ནུབ་གཞས་ཀྱི་ཆས་དེ་ཡང་ འབྲུག་མི་ཚུ་ག་ར་བློ་སེམས་ཆོས་དང་མཐུནམ་མ་ཚད་ ཕྱི་ནང་གསང་གསུམ་གྱི་གདམས་ངག་ཟབ་མོ་ རང་རྒྱུད་ལུ་ཚངམ་སྦེ་ཡོད་པའི་བརྡ་མཚོན་ལུ་ གཟུགས་ཁར་གོ་དམརཔོ་གྱོན་ མགུ་ཏོག་གུ་ཐོད་དཀྱིས་ཏེ་རྐྱབ་ཨིན་པས། དེ་ལས་གོ་གི་ཕྱི་ལས་སྟོད་གོ་ཧོནམ་གྱོན་ བཀབ་ནི་ཁ་དམར་བཀབ་མི་དེ་ འབྲུག་རྒྱལ་ཁབ་ནང་ སྔོ་ཤིང་ཚུ་ག་ར་ སྔོ་སྨན་གྱི་རང་བཞིན་ཨིནམ་མ་ཚད་མི་ཚུ་ལུ་ཕྱི་ནང་གསང་གསུམ་གྱི་སྡོམ་པ་ གཙང་ཏོག་ཏོ་འབད་ཡོད་པའི་བརྡ་མཚོན་ཨིན་པས། དེ་དང་འདྲཝ་འབད་རྐང་མ་ཚོགས་ལྷྭམ་དང་ ལག་པའི་ཨམ་མཐེ་བོང་ལུ་དུང་དཀར་གྱི་ཨ་ལོང་བཙུགས་མི་འདི་ ཤར་ཕྱོགས་འཁོར་ལོ་རྩིབས་བརྒྱད་ག་ར་ མངའ་འོག་ལུ་འདུ་སྟེ་ བོད་དམག་ཚུ་ལོག་ཡར་བསློགས་བཏང་བའི་བརྡ་མཚོན་ཨིན་པས།
གཞས་ཀྱི་ལེའུ།
ནུབ་གཞས་ལུ་ལེའུ་མ་འདྲཝ་ དང་པོ་ཕྱག་འབུལ། གཉིས་པ་མཆོད་འབུལ། གསུམ་པ་ཤར་ལས་ཁྲི་གདུགས། བཞི་པ་གཞས་ལ་ཕ་གཅིག། ལྔ་པ་གཞས་ཀྱི་འཁྲུངས་ས། དྲུག་པ་གཞས་ལ་སྒོ་ཅིག་ཕྱེ་དགོ་པས། བདུན་པ་ཆོས་ཞུ་བ། བརྒྱད་པ་སྟེང་སྐར་གཟའ་རྩིས་པའི་ཉིན་བཟང་། དགུ་པ་ལྷོ་ཕྱོགས་ནོར་བུའི་གླིང་། བཅུ་པ་དབུས་ཀྱི་རི་བོ་ཕྱོགས་རབ། བཅུ་གཅིག་པ་གནས་དག་པའི་ཞིང་ཁམས། བཅུ་གཉིས་པ་མོན་ཚལ་ཁ་སྐྱེས་པའི། བཅུ་གསུམ་པ་ཀོང་ཡུལ་ཤར་བྱུང་། བཅུ་བཞི་པ་མེ་ཏོག་སྒྲོལ་མ། བཅོ་ལྔ་པ་རྒྱ་ནག་མཚོ་མོ། བཅུ་དྲུག་པ་གཞས་ཀྱི་གསུང་། བཅུ་བདུན་པ་ཐང་དཀར་རྒོད་པོ། བཅོ་བརྒྱད་པ་དགུང་སྟོད་མཐོན་པོ། བཅུ་དགུ་པ་ཐགས་བཤད། ཉི་ཤུ་པ་བསྟན་པ་ཡོང་བ། ཉེར་གཅིག་པ་མཐོ་ལ་ཡངས་པ། ཉེར་གཉིས་པ་བཀྲིས་དང་བཅས་ཡོདཔ་ཨིན་པས།
ཞིབ་འཚོལ་དང་ཕྱོགས་བསྒྲིགསཔ་ སློབ་པངྨ་དོན་གྲུབ།